ԷկոԼաբ հիմնադրամի նպատակն է խթանել Հայաստանում ակտիվ քաղաքացիությունը, ժողովրդավարական կառավարումը և կենսակայուն զարգացումը գյուղական համայնքների երիտասարդներին վերոնշյալ թեմաների շուրջ իրազեկելու, առկա հնարավորություններին հասանելիություն ապահովելու և հզորացնելու միջոցով: Երկրում քաղաքացիական մասնակացության մակարդակը բարձրացնելու և ոչ կենսակայուն բնապահպանական մտածելակերպը փոխելու նպատակով ԷկոԼաբի ծրագրերը զարգացնում են երիտասարդների՝ ժողովրդավարական, խաղաղ և կայուն Հայաստան կառուցելու կարողությունները։ Իր ծրագրերի միջոցով ԷկոԼաբը երիտասարդներին օգնում է ձեռք բերել ներքին հավատ և հավաքական ուժ, որով նրանք կկարողանան նպաստել երկրում որոշումների կայացման գործընթացի վրա ներազդելուն և իրենց համայնքների համար ավելի լավ վաղվա օր կառուցելուն: ԷկոԼաբ հիմնադրամի գլխավոր ծրագրերից է «Re.Action»-ը, որը քաղաքացիական կրթության և կենսակայուն զարգացման թեմաներով ոչ ֆորմալ կրթական ծրագիր է ՀՀ մարզերում բնակվող երիտասարդների համար: ԷկոԼաբ հիմնադրամի գործունեության մաս է կազմում նաև «Բու այլ տուն» սոցիալական ձեռնարկությունը, որը բնապահպանության և կենսակայունության մեր տեսլականը արտացոլող դասընթացների տարածք է, համայնքային կենտրոն և զբոսաշրջային վայր Լոռու մարզում։ ԷկոԼաբ հիմնադրամի գործունեությունն ամբողջովին իրականացվում է մի խումբ երիտասարդների կողմից, որոնք նախկինում եղել են ծրագրի մասնակիցներ: Հիմնադրամի համակարգող թիմը բաղկացած է երեք հիմանական աշխատակիցներից, ում աջակցում են կամավորական և պայմանագրային հիմունքներով աշխատող ինը այլ անդամներ, որոնք նույնպես ԷկոԼաբ ծրագրի նախկին մասնակիցներ են։ ԷկոԼաբի թիմը և կամավորները հավատում են նրա առաքելությանը և ժողովրդավարական սկզբունքների, ներառականության, գենդերային հիմնահարցերի և բազմազանության համընդհանուր արժեքներին: Հպարտ ենք նշել, որ հիմնադրամն ինքնին օրինակն է այն բանի, թե ինչպիսի հաջողություն են բերում թիմային աշխատանքը, նվիրվածությունը և երիտասարդների մասնակցությունը: ԷկոԼաբի նվիրումն իր առաքելությանն ու տեսլականին հանգեցրել են բազմաթիվ կենսակայուն արդյունքների, ինչպիսիք են կենսակայուն զարգացման և ակտիվ քաղաքացիության կրթության վերաբերյալ ձեռնարկի ստեղծումը, սոցիալական ձեռնարկատիրության ուղեցույցը քաղաքացիական հասարակության կազմակերպությունների համար, տեղացի դասընթացավարների, մենթորների և կամավորների աստիճանաբար մեծացող ցանցը։ 2012 թվականից ի վեր 11 երիտասարդներ ավարտել են Theodor Heuss Kolleg դպրոցի դասընթացավարների ուսումնական ծրագիրը՝ գտնվելով ոչ ֆորմալ կրթության մեթոդաբանության մեջ փորձառու դասընթացավարների վերահսկողության ներքո: Նրանց օգնությամբ ԷկոԼաբ հիմնադրամի դասընթացավարներն այժմ համապատասխանում են Եվրոպական միության՝ երիտասարդների հետ աշխատող դասընթացավարների որակի չափանիշներին: Ժամանակը ցույց է տվել, որ ԷկոԼաբի մոտեցումն ու մեթոդաբանությունը բերում են հաջողության, կարողանում են ներգրավել Հայաստանից և աշխարհի տարբեր ծայրերից եկող երիտասարդների՝ դարձնելով նրանց ակտիվ քաղաքացիներ և հզորացնելով նրանց՝ որպես փոփոխություն իրականացնողների: Չորս տարի շարունակ ոչ ֆորմալ կրթության ծրագրեր իրականացնելուց հետո` 2015 թվականին, ստեղծվեց և գրանցվեց Կենսակայուն զարգացման և ակտիվ քաղաքացիության ԷկոԼաբ հիմնադրամը։ Այդ ժամանակից ի վեր ԷկոԼաբը ճանապարհ է հարթում Հայաստանի համայնքային կյանքում և քաղաքացիական գործընթացներում երիտասարդների մասնակցության համար։ Հիմնադրամը սերտորեն համագործակցում է տեղական և միջազգային գործընկերների հետ։ Այն Հայաստանում Բնապահպանական կրթության ցանցի (ԲԿՑ) և MitOst ասոցիացիայի (Գերմանիա) ակտիվ անդամ է։ Վերջինիս հետ հիմնադրամը համագործակցել է` մի քանի տեղական և միջազգային ծրագրեր իրականացնելու համար։ ԷկոԼաբը նաև Գերմանիայի դաշնային գործակալության՝ «Արևելյան Եվրոպայի քաղաքացիական կրթության» ցանցի և Ashoka ChangemakerXchange հարթակի անդամ է։